sen. Alsoo malkanderen ettelijcke dagen te voren in zee versproken hadden, was goet ghevonden, dat in dese Haven niet loopen souden, doordien eenige seyden, men daer qualijck tot sijnen wille uytkomen konde, om dat de Z.Oost winden daer sterck de Haven inwaeyen, dies sy, doen die van 't Schip haer ghesien hadden, haeren cours voorby de Haven stelden, om op de Molucksche Reede te loopen aen de N.W.zijde.

Den 27^e dito stilte halven hebben het gheset onder eenen hoeck, daer eenen hooghen stompen bergh staet, ghenaemt den Fenijnigen hoeck, hier vingen stracks soo vele Visch, dat zyse weder over boort werpen moesten, want die uyt den goeden niet opeten mochten.

Desen hoeck wordt alsoo gheheten, om dat het volck van de vorige Schepen hier soo subijt sieck wierden, als, oft sy vergheven hadden gheweest, ghevende den Visch de Schult, dan hebben 't anders bevonden.

Den 29^e dito is 't Schip Medenblick by haer gekomen, hadde het gantsche Schip omladen, ende den last gheleydt in 't Packhuys, dat den Admirael Warwick daer ghemaeckt hadde, ende 't Schip overghehaelt, ende schoon ghemaeckt soo verre konden, dorsten het soo vele niet op zijde krengen, door vreese van omvallen, want geen ophouder hadden, laghen daer in alles 3 maenden, ende in 54 dagen 't Schip ontlost, wel versien van buyten, ende van binnen (naer de middelen die sy hadden) ende weder geladen, ende dat met 34 eters. Den Oppercoopman Iacques de Mulder was aldaer den 7^e October ghestorven, ende begraven, de Coques boomen door Warwijck, ende Orangie, ende Bananesboomen, door den Capiteyn van 't Schip d'Eendracht aldaer geplant, hadden tamelijcke voortgang, als oock deden de Bocken ende de Geyten die alreede 17 in 't ghetale, ende 5 Koeyen die seer vet waren, doch heel tam, haer ontrent de huysen hou-